Aasmund Olavsson Vinje: «Blåmann, Blåmann, bukken min»
Frå Alnakka.net
«Blåmann, Blåmann, bukken min»
av Aasmund Olavsson Vinje
- «Blåmann», «Blåmann», bukken min
tenk på vesle guten din!
Bjønnen med sin lodne feld
kann deg taka seint i kveld.
- Gamle «Lykle», moder di
seint kom heim med bjølla si.
So ikring seg ho mund’ sjå,
liksom det var fåre på.
- Det såg ut som der var naud,
kanskje no du ligger daud.
Tidt du dansa kringum meg,
mangt eg rødde då med deg.
- Når eg låg som blind og dauv,
grov du på meg med di klauv;
ja du vilde vekkja meg
upp til leiken din med deg.
- Du var spræk og glad og god,
all min ros du vel forstod.
Tidt du veit eg sa til deg:
«Han veit meir enn mata seg.»
- «Blåmann», «Blåmann», svara no,
mekra med din kjende ljod!
Ikkje enno, «Blåmann» min,
må du døy frå guten din.
Kjeldor
Seip, Karl: En liten visebok for hjemmet. Oslo : H. Aschehoug & Co. (W. Nygaard), 1929.